საცხოვრებელი სახლის ინტერიერის გადაწყვეტა, რა თქმა უნდა ინდივიდუალური საკითხია. ოთახების ფერთა გამა, ავეჯი, განათება, ტექნიკა თუ სხვადასხვა ნივთები ქმნის საერთო ინტერიერს, რომელიც მეპატრონის შესახებ მოგვითხრობს. სხვადასხვა საგნების დახმარებით, შეგვიძლია ნებისმიერი ინტერიერი უფრო მყუდრო და ამავდროულად მრავალფეროვანი გავხადოთ.

ლარნაკი

დეკორატიული ლარნაკი ინტერიერის გაფორმების ერთ-ერთი პრაქტიკული და ამავდროულად ორიგინალური იდეა შეიძლება იყოს. აუცილებელი არ არის ვაზაში ყვავილები მოვათავსოთ, ინტერიერისთვის ხშირად დამოუკიდებლად მდგარი ლარნაკი უფრო ეფექტურია.

მცენარეები

ყველასთვის ცნობილია, რომ მყუდრო და ამავდროულად ესთეტიური გარემოს შესაქმნელად, საუკეთესო არჩევანი ინტერიერში მცენარეების მოთავსებაა. გარდა დეკორატიულობისა, მცენარეები გამოყოფენ ჟანგბადს და ასუფთავებენ ჰაერს. არსებობს კონკრეტული ქოთნის მცნეარეები, რომლებიც სახლში სხვადასხვა ოთახში შეგვიძლია დავდგათ. მაგალითად დრაცენას მაღალი ტენიანობა უყვარს, შესაბამისად ის შეგვიძლია სააბაზანოს მოვუხდინოთ.

აივანი, კალათში ჩარგული პეტუნიას ფერადი ყვავილებით შეგვიძლია გავალამაზოთ.  ინტერიერის მცენარეებზე საუბრისას აუცილებელია ფიკუს ბონსაის ხსენება, რომელსაც სახლში მაქსიმალური სიმყუდროვე და სიმწვანე შემოაქვს.

ელექტრო ბუხარი

ინტერიერში ბუხარი ხშირად განსაკუთრებული ელემენტია და ის ბევრი ადამიანისთვის სითბოსა და სიმყუდროვესთან ასოცირდება. დამეთანხმებით, თანამედროვე საცხოვრებელ კორპუსებში, კლასიკური ბუხრის ჩაშენება საკმაოდ ძვირი და რთული პროცესია. მარტივი გამოსავალი ელექტრო და ბიო ბუხრის შეძენაა, რომელიც შეიძლება როგორც დეკორის ფუნქციით ისე გამათბობლადაც გამოვიყენოთ. ბაზარზე წარმოდგენილია ელექტრო ბუხრის ბევრი დიზაინი, რომელიც შესაბამისად თითქმის ყველა ინტერიერს შეგვიძლია მოვუხდინოთ.

სანათი

ოთახის ინტერიერის ერთ-ერთი მთავარი ელემენტი - განათებაა. ფუნქციურთან ერთად განათებას დეკორატიული დატვირთვა შეგვიძლია შევძინოთ, ამაში კი მაგიდის სანათები დაგვეხმარებიან. სითბოსა და სიმყუდროვის შექმნაში ოქროსფერი ნათურები უნდა გამოვიყენოთ.